كانت الأيام بِخيرها والقلوب حَيَّة بضميرها والخلايق رَغم جُوعها مؤمِنة وبتحِب غِيرها راضية بالمقسوم عَشانها تشكرُه وتعطِى لجيرانها واستحالة تنام عُيونها قبل ما يشبَع جعانها والكلام الحِلو مِنْها عُمرُه مايفارِق لِسانها لو يغيب واحِد ويرجع يلقى غٍيبتُه الكُل صانها بالأصول وبشكل وِدِّى زَىّّ مَبتاخُد هَتِدِّى النهاردَه الغَدوَة عَندَك واللِّيلادِى العَشوَة عَندِى خَلُّوا لُون الدنيا وَردِى مَهما تِقوَى الرِّيح تِعَدِّى لَمِّة الشَّمل اللى بينهُم قُوَّة بتزيدهُم تَحَدِّى فى الفَرَح الدَّعَوَة عامَّة وفـ ظروف الحُزن لَمَّة وفـ سبُوع النُّونُو هِيصَة والجميع كَبَّر وسَمَّى هِيَّا ناس على بعض واخدة مَتلاقِيش واحِد فـ وِحدَة كُل شئ بينهُم مُشاركَة قَلب واحِد ، يَد واحدَة لو يضيق الحال يغمُ ألف باب للخير يعُم اليتيم يِلقالُو أَب واللَطيم بتعيشلُو أم طَيِّبين آخر طَيَابَة فَقرُهم مش عَن خَيَابَة أصلُهم عَاشُوا زَمانهُم أغنِيَا فـ صُورِة غَلابة دِى الشَّهامة مش قِوَالَة والرجُولَة مش عِوالَة يعنى إيه تبقا انتَ راجل بَس مَحسُوب عَـ البَطَالة الإيدين الناعمَة عِيبة والعَرَق قِيمَة وهِيبَة والكرامة للعجوز لمَّا يجنِى وهوَّا شِيبَة مَحنِى ضَهرُه طُول سنين وبإديه يزرع فـ طِين لَجل مَـ يَعَزِّز فِـ نَفسُه عَن سُؤال المَبسُوطين باختصار كانوا يَـ سادَة ُهُمَّا أصحاب السعادَة وِدُّهُم كان مش مُجاملَة إنَّما كان زَىّ عادَة
كانت الأيام بِخيرها