عِيدى نفسك يا جميله.......الشاعر وائل عبد الله

ـــــــــــــــــــــــــــــــ

ـــــــــــــــــــــــــ
كل يوم الضيق بيوسع
وانتى لسه بتهربى
كل يوم اغفر و اسامحك
وانتِ رافضه تقربى
كل يوم مليون سؤال
وانتِ عاجزه عن الاجابه
انتى بتحبى اللى خانك
ولا بتحبى الغلابه
انتى حضنك للى باعك
ولا خيرك للعصابه
كسروا البرواز عليكى
والقزاز جرح عنيكى
كل يوم حضنك يعتم
كل يوم يزداد كئابه
كل يوم السوس فى دارك
بين كفوفك وانكسارك
كل يوم الخونه تحلم
يعلنوا خبر احتضارك
وانتِ لسه بتعشقى
تراب البياده
تعشقى اللى يدوس عليكى
تنكفى لجل السيادة
ياغبيه
هوا داء مسعور فى دمك
ولا دى نوبه بلاده
علمونى اعشق ترابك
بالعصايا
درسولى فى الكتب
قيمه غلاوتك
وان حبك يبقى وحده
اسمى غايه
حببونا فى العلم
امر وغلاسه
كل يوم اخر الطابور
نرفع ايدينا
واحنا حوالينا المرار
طافح نجاسه
كيف احبك
وانتِ والفقر اتفقتوا
تبقوا عله فى جسم ابويا
وتشاركوا ف مماته
تبقوا ضحكه جنب اسمه
فى شهادة وفاته
كيف احبك
يا عليله
قلبى كان عاشقك لكنه
بعد جرحك
عاش بخوفه سنين طويله
كيف احبك
وانتِ خوافه وبخيله
كل يوم الضيق بيوسع
والطوفان واخدك بناسك
عالخيانه وعالرزيله
وانقلابك مهما ساسك
مهما حكمك ولا داسك
برضوا ايامه اللى جايه
ع اللى ثار صبحت قليله
عِدى نفسك يا جميله
عِدى نفسك يا جميله
ــــــــــــــــــــــــــــــــــــــــــــــــــــــــــــــ
وائل عبدالله
18\يناير \2015