حبة توتر ينعشوا القلب اللى زاهد
فى الحياة
واللى مادد روحه ضِله
فوق جبين الولهانين
واللى زايد نوحه فى الحِس الحزين
حُبك إنت يلزمه حبة سُهاد
يلزمه شدة وتَر
مايلينش أبداً فى العناد
يلزمه بُعد ولُقا
يلزمه حبة شقا
هجر ووداد
ماتقولش ليه السهم راجع
إيده فاضيه
ولا مش غرقان حنين
سهم شوقك لجل يوصل
علمه إن المحبه روح ودم
علمه يحمل لقلب حبيبُه هَمْ
علمه شوق الحبايب لما دابوا فى القُبَل
فهمُه كُل الحيّل ترانيم/ وضَمْ
إمتى حُبك ينتشى فـ الهمس قوللى؟
إمتى جسمك يترعش لحظة تجلى ؟
إمتى هاتجوب الخلايا ليل وضُهر؟
ياللا فُض الغيم وحدد لينا دور
المحبة مش بجاحه أو فجور
الصبيه الدايبه فيك
خارجه من طور البراءة
لابسه طُهر
وانت حلمك بالدفا فـ العتمه زيف
إنت ساكن فـ الوجع
مقهور / ضعيف
إنت جامع ليا / مانع روحى عنك
عنك الأيام بتسأل كُل حين
إنت فين ؟؟
إنت مين حلل دخولك ع الضمير
قبل ماتقدم فروضك بارتجال
قبل ماتفَكَر وتسهر
كل ليلة ألف ليلة بانشغال
إفتعال اللهفه ديا
مش طريق الأوردة والإنسجام
مش هابقى تانى قُريبه
وارجع لعهد الطبطبه
ولا طيبه ساعة الجفا
ولا تايهه ساعة الإهتمام
قصر الكلام والدندنه
أنا مش هِنا
ولا عندى نظرة حنينه
ولا بال طويل
ولا حاضنه فـ الليل القمر
ولا عايشه فيك الخوف شجر
ولا ناويه اخوض المستحيل
صار الألم
يكتب حروفى مفرده
لمسة إيديك متردده
تاخد قرار
أنا مش هِنا
ولا مؤمنة غير بالهيام
قُصر الكلام والدندنه
أنا مش أنا
ولا هابقى ليك برد وسلام
_________
رشا الفوال