يا كل واحد....قصيدة للشاعر / ميدو زهير

يا كل واحد كان جميل
وتاه ف ليل
وخانُه حَد
يا كُلَ مَن..إنسان بجد
الحزن دُور.. والفَرح دُور
وهايجي يوم
تفرح لابُد .
الدنيا فيها الكَدابين
والمَخدوعين مِن نفسُهُم
والطَيبين التعبانين
المَبسوطين علي قَدُهم
ومعاني زي الفُل
عُمرها مانتَهِت
لو جِه عليك الكُل
وعنيك دَمَعت
لا تعيش أسِير الذُل
ولا تِبخَل ب وِد
يا كل واحد كان جميل
وتاه ف ليل
وخانُه حَد
يا كُلَ مَن..
إنسان بجد .