وشيخ الزاوية والقسيس
ورغبة روحنا فى الممنوع
وضى الشارع المقطوع
بعيدًا عن رغيف البوح
وقطر اللهفة لمّا يروح
بلا عنوان
بعيدًا عن مآسى زمان
وكل عويل علينا طاااف
رمىّ وحلُه
وكل شريف بقا فاكر
بإن التُربة أريحلُه
بعيدًا عن دُعاة الزيف
وكل سخيف وكل ضعيف
وكل جبان رمىّ لحمُه
وباب مستشفى نام ع الحيط
وساب الخلق يتزاحموا
بعيدًا عن حيطان الغُلب
وشقوقها
ولقمة قهر بندوقها
عرق مشاوير
بعيدًا عن حقوق الغير
وحقى لو عليكم هان
بعيدًا عن مناسككم وقداسكم
وبطحة كبيرة فوق راسكم
وطلبة كثييير
بترسم فى العلم مرفوع
وتفتح بالعيون موضوع
عشان الدرس أصلُه ممل
بعيدًا عن خيال الضل
فـ وقت الندهه مش موجود
مانيش ناوية اعطلكم
ولا ناوية أفكركم
بأى عهود
عشان الدنيا دى قصة
كتبت الليلة فيها ختام
وهادى لروحى فرصة تنام
وابوس قلبى واحِن عليه
ويمكن اجوود برنة عود
عشان عندى ميعاد تانى
هامارس فيه طقوس تانية
أنا والدووود
..............
رشا الفوال