تلاقى الفرحة بتعاند...قصيدة للشاعرة / مروة سليمان

تلاقي الفرحه بتعاند
وترفض حضنك الدافى
ساعتها الحزن راح يضحك
وتلقى الدمع مش كافى
يخفف أهه من قلبك
فبتموت الحياه منك
وتتكفن باحلامك
لكنك ف الوجود عايش
وبتشخبط على ورقه
شويه حبر متعكر
بحبه حزن
تلاقى السن متحطب
ورافض حتى اشعارك
وحلمك بينه متعطب
كانه كابوس
بتتمنى يجيك الموت
لكن دمعك بيرفضها
وبيغلوش على موتك
فتستسلم لأحزانك
وترجع تمسك الورقه
وحبه حبر
تقول هرسملى حلم الموت
وروحك نازله تتسرسب
مابين نبضك
تلاقى الحبر راح ينزف
على ورقك
وتلمح حلمك الميت
مع اخر نفس منك
بيخلق من فراق روحك
شويه نبض لايامه
وخيط للفجر بيشقشق
ويخلق بعد موته حياه