نجاة قلبى فى لحظة حب غرقانه بتاخد كل طاقة الشوق وبتسهر مكاتيبى اقوم اكتب لك اللهفة وأتنفس خيالك طوق واسيب نفسى ما بين الصمت والفكرة تودى الحب وتجيبى وباطلع فوق شواشى الليل واحس العمر تقريبى ماهو انتى لما بتغيبى ؟ بحس بإنى مش موزون
و متلخبط ف ترتيبى بيبقى القلب مش هوه واحس بروحى مش جوه وبيكون الشعور مقلوب ويبقى الجلد مستمتع بتعذيبى وباشتاقلك وباشتاقلى ولما بحاول استفسر عن الموضوع بلاقى الفكر مش وارد على عقلى ويتهيألى إنى اتنين طريقك فين ياواحة ساكنه تفكيرى يا اجمل حلم محلمتوش لكن شوفته فى تقديرى يا تحريرى ياثورة قلبى على روحى يا أجمل جرح فى جروحى يا مجموعى اللى عدى المية فى المية انا تلميذ وباتعلم مناهج حبك الأستاذ انا طالب إيدين النور يا صبحية. يا اجمل ماتخلق فيا يا طاقة قدر مفتوحة وفيها الدنيا شراعة مابتزودش ولا ساعة وسايبانى شباب على طول ورامية العمر ف إيديا سنين عمرى اللى بتعدى ولا بتاخد ولا بتدى كأن الدنيا مش قدى وهيه تطول؟ ماهو ودك على ودى ماهوش معقول أقولك سر ؟ والله ما عاوز اقول عشان سرى اللى جوايا كانه رسول وجاى ليا أنا لوحدى
يعلمنى ويهدينى ويدينى لقلبى حلول ……..لكنى هاقول عشان ارمى عليكى حمول انا م العالم التانى بتاع الشعرا والأحرار ونازل دنيتك مخصوص عشان اتعلم الأشعار واروح اعمل هناك ثورة
واغير جملة الأفكار لكنى بقيت أسير عرشك وراضى بحبك القمعى وراضى بعشقك الجبار ونفسى أعيش على أرضك وتحكمنى عنيكى السود ومش هاقطع خلاص قلبى ومش عاوز أكون مولود فا وحياتك بلاش تمشى ((عيون القلب سهرانه ما بتنامشى)) وآه يا نجاة
