قاللى سلامو عليكو بجد
انا استغربت
انا كنت وعهد الله قربت اقول
دى لغوها من الإسلام
أو إنى سافرت بلاد الكفر
وانا اتغربت
خلانى ضربت اخماس ف اسداس
ونحاس ف رصاص
ورجعت افكر تانى بعمق
واعيد الربط
فالقيت الناس ملهاش مقياس
ومفيش ترتيب منطقى للجسم
ولا الإحساس
ولقيت الروح رغم انها خارج حد العلم
اساس
بيشيل تركيبة من الأحداث
الحب.. الكره....الدوشة..الصمت
النور ....الكبت
فأخدت حواسى الخمسة ورحت اسألنى
انا مين من دول
فالقيتنى بجد مانيش معقول
وماليش تفسير
رغم انى بكل وضوح الشمس
باتمنى الدنيا تسير بالعكس
يعنى لو كان اليوم الحد..ياريت الغد
يكون السبت
وياريت لو أرجع تانى
إنشالله لأول حتة طين
ماهو اصلنا كده راجعين..راجعين
فيا ريت ارجع من هنا أنا حاسس
انى هاتوه وتعبت
قررت اقضى العمر الباقى
اسير بالضهر
وبدال ما اطلع ستين.انزل تلاتين
وأرجًع جدى الميت من تسعين سنه
أو تقريبا قرن
ايام القمح ما كان فى الجرن
وعيشنا الساخن ملو الفرن
واجيب الحب اللى اتربينا عليه
لما بيخش القلب وكان يخلع نعليه
وانا راجع الم كمان بطولات
وكمان زكوات وكمان صلوات واشوف فتوحات
وارجع ارجع ارجع ارجع
اشوف أخلاق واشوف أشياء يتحدث عنها الدهر
السلف الصالح والتابعين
والفقه وأصل اصول الدين
لغاية ما اوصل مسجد سيدى رسول الله
واشوف جبريل قاعد وياه
اقول له سلام عليكو يا سيدنا
يقوللى عليك سلام الله
الله الله الله الله
.............
حمدي موسى