قصيدة وطن....للشاعر محمد على

آآه يامَّاى مِ الوجيعة ف كل غالى
آه يا الليالى مكحَّلة بذُل العبيد

... لابسين سواد على كل صوت عالى
و الخرسانين لابسين جديد ف العيد
--------------------------------
يا وِلْد ابو زيد الهلالى مالُه الفرَس عَرجان
و اليُتم سايب للغلابة عضم ابوهم

يا قلب اُم العريس من ريحة الاكفان
... و القبر لم الاتَر و عيونى ما سابوهم
--------------------------------
ميِّت كسيح يا قلب عاش راجل
راجل و ضهر الصبى عمره ما كان محْنِى

عاش المقدَّر وامَّا مات راجل
شب الكسيح للفضا قام و كسَّحنى
--------------------------------
يا امَْاى امانة للى جاى بعدى
يكتب على قبرى مات فى يوم العُرسْ
و اوعاكى يامُّو الغلابة تكفنيه ف لحدى
و تسيبى صوتى يركبوه الخُرس

--------------------------------
آآآآآآه

يا الطريق مخنوق تحت الخطاوى المبتورين
و الضل تاه بين زحمة المخاليق

آآه يا وطن يا سجن يا جنة المجانين
يا ساحة واسعة لمِّا الامانى تضيق
--------------------------------
سيفى امانة والامانة سيف
و فرسى مهما كان عرجان اسرع من الباطل

عينى و لو غمضانة عمرى ما كنت كفيف
و يكفِّى انى قتيل على حاجة تستاهل