مفتتح
ياشعر انت قدها
إيدك على كتف الزمن
متحطهاش على خدها
ابعت معانيك الطوال
وصلها آخر أرضها
فى كل كلمة بيتخلق جواك ضمير
خلية يغير
الدنيا فضحت نفسها
حاسة بمشاعر بس ناحية جنسها
الدنيا شاذة..نصها على نصها
الدنيا ماشية فى الغلط
الدنيا مش على بعضها
.........................
القول قول أبى الحكم
...
خالتى وخالتك والخالات اتفرقوا
راح اللى راح ينحرقوا ولا يغرقوا
يالله أنا....مالى أنا....نفسى أنا
طب دين أبونا وامنا هيقول يا مين
متنازلين عن كل فتوحاتك يا عمرو
متنازلين عن كل فتوحاتك يا سيف
افتح حدودك يا جدع خليك لطيف
مات النبى
ارمى الشهادة وتقلها خليك خفيف
سيبك من اللى ظن أن سيورثه
لو حتى كان عاجز كفيف
عضو اشتكى نمنا وشدينا الغطا
دا حديث ضعيف
حتى المذيعه أعلنت
إن الحكومه أرسلت لاخواتنا شحنة
بول وبيف
مش ناقصة هيه مرمطة
غير قناة السفسطة
....
ــــــ ادخل طابور الميتين
اسمك مسجل فى الكشوف
مش مرة واحدة ....مرتين
ـــــ حطوا الجلود جنب العظام
حبة نظام
هاتوا البرص جنب الجزام
شدوا على النفس الحزام
ورق الشجر غطوه بجاز
خبوا الحقيقة والمجاز
هاتوا الأسامى ع اليمين
ودوا المعانى ع الشمال
رشوا المطهر ع العفن
ياعم مش لازم كفن
دا يبوس إيديه انه اندفن
دا صبــــــر ونـــــــــال
الفاتحة على روح الزمن
الفاتحة على روح الصومال
........
الوالى نادى على الوزير
الدنيا قاسية ليه كده ؟
مش طايق العمة ولا الشال الحرير
ابعت رسالة للسفير
يبعت لنا حبة هوا
وكمان يجيب فنطاس دوا
م اللى بيشيل الحموضه
واللى بيزيح الضمير
هاك الرقم .....فالقول قول أبى الحكم
ــــ لابد من قتل العبيد
اتركوهم بالعراء ليكرهوا الدين الجديد
الصبر فاق الاحتمال
..
تانى أمية لسه بيعذب بلال
أحد أحد
تانى سمية بيقتلوها فى الصومال
....
ارمى نقوطك فوق صدور الرقاصات
اسكر على كل البارات
صيف على كل الشواطئ وامشى حافى ع الرمال
عورتك بانت على كل الخلايق فى الصومال
انا عارف انك منتظر تليفون جديد
كلمتك مش كلمتك
إمتى هتلغى العيد
فالقول قول أبى الوليد
نفرغ من احتفالات الكريسماس
بعدها سنقول رأيا فى العبيد
يا جارية
قولى لأصحاب الرايات الحمر إنا قادمون
فليستعدوا بالعواصم كلها
إنا لمنصورون.......سيرون منا ما يكون
..
القدر فوق النار بيصرخ م الكسوف
وام العيال عماله بتلملم حروف
بتسوى حلة كدب منزوع الأمل
عماله بتنادى على النوم البعيد
يمكن يكون النوم غذا
والواد ماهوش عاوز ينام إلا إذا
ظهرت فى جوف القٍدر طاقة قًدر ولا معجزة
ـــــ ابعت لهم شحنة حطب ..برو العتب
فالقول قول أبى لهب
تبا لدين محمد ..أيسبُنى ؟
ويقول فى قرآنه تبت يدا
نحن الذين نخوض فى كأس الأمم
سيرى الجميع الوالى فى تلفا...زنا
سيرونه متعاطفا ومشجعا ومؤذنا
ويرونه متحمسا ومؤيدا
تبت يدا ؟
واللاة والعزى لنهزم الكاميرون والسنغال
اليوم يومك يا دمشقى الهوى
لننال كأس القدس إلا المسجدا
..
الدنيا مش مستغربة والفرع مال
حد الزنا
بيطبقوة على واحده عايشة فى الحلال
وكأن آدم له عيال أو حد تانى له عيال
مين السبب ؟
وقع النصيف عن الأدب
يا أمة متجردة..قد قال فيها النابغة
فين اسماعيل يضرب برجله زمزمه
فين ابراهيم علشان يؤذن فى البشر
فين موسى يضرب بالعصا كل البحور
فين المسيح يمكن يصحى الميتين
لسه النبى فى شعب ابو طالب سجين
والمسلمين .....منعوا زكاة المال
وارتدت الأمة على أعقابها
وأدوا الصومال
ملعونة آبار الدهب
لما يكون القول..قول أبى الحكم
والقول قول أبى الوليد
والقول قول أبى لهب
....
حمدي موسى