سيدنا النبى....قصيدة للشاعر / محمد ابراهيم

سيدنا النبى إتأخرت ليه ؟! ..
انا حاسس انى مزعلك ..
وإن كنت طيب قول فـ ايه ؟! ..
آخر زياره فـ المنام كات من زمان ..
مشتاق وفين طب سكتك ؟! ..
كنا إحنا قاعدين فـ السما ..
كان البشر ملو المكان ..
وانا ركبتى كانت مجاروه ركبتك ..
وضحكتلك فـ ضحكتلى ..
كان شكلى أوضح وقتها ..
كنت إنت أجمل من جمال الجنه والناس كلها .. ..
قولتلك موجوع يا طه ..
قلبى كاتم ألف آها ..
مس كفك نار ضلوعى ..
من سكات بهدوء طفاها ..
والتقيت الهم أصبح ..
ماضى أصلا وإنتهى !