انا مجنون....قصيدة للشاعر / عمرو حسن

انا مجنون وهو عارفني بطباعي
وعارف ان انا مجذوب
وعارف ان انا عاصي لكني بتوب
وبارضي بقسمة المكتوب
وعارف ان انا فاشل وصايع برضه من يومي
وعارف ان انا خجلان وعرقي بيجري ف هدومي
وعارف ان فيه واحدة صورها ماليه ألبومي
وعارف ان انا سكران بشوق باين
وعارف ان انا مصاحب صديق خاين
وعارف ان انا فلاتي
وليا ف كل سيما بنت
وعارف ان انا نفسي
اقابل واحدة تملكني
واكون زوجها وفارسها
تكون البحر
اكون موجها ونوارسها
تكون بستان
اكون شوكها ونرجسها
وعارف ان انا طيب
واني بسيط
واني بطبعي قلبي عبيط
باصدق رعد ومازنجر
واصدق ان فيه ماجد
وفيه بكار
واصدق ان فيه طيب بيهزم كافة الاشرار
واصدق ان فيه واحدة
عنيها نصها جنة
وباقي عنيها صهد ونار
فبالذمة .. هلاقي مين يشيل همي
ويسمعني
ويعرف ان انا كداب يصدقني
باعيّط دمعي ينزل فيه
وباضحك يبتسم زيي
هلاقي مين يكون طيب معايا بجد
وباقسى عليه
هلاقي مين بدون طلبات يسيبلي ايديه
هلاقي مين يكون صاحبي الا هو .. مج النسكافية