أحلم....قصيدة للشاعر / حسام حسين

أحلم بأن الموت نهاية
لكشف سر اللغز
سرير مريح راح يوهبك
نوم مستحيل
يتحس
واحزن على اللي اختار يعافر
دنيا ف سرير من قلق
بيغطي حلمه الكدب
***
رتـِّب خروج آمن؛ لحلمك م الحياه
طبطب على الشيب
لما يعلنها بوضوح
أن اللي فاضل مش كتير
استثمر الوقت ف نصيحة
- يا ربما-
تنفع حزين
***
سافر لأرض الحلم
بجناح من خشب
راهن بان الدنيا صعب هاتوهبك
غير غربتين:
محروق بنار أهلك
منبوذ ف أرض الناس
مكسور على الحالتين
***
موت بانسجام
رتِّب تفاصيل الختام:
اعزل غريب في القبر
{مش كل موتى المسلمين أبرار}
ناور بدودك أي حد هايسألك
ليه الفورمالين فواح وزاعق م الكفن
هو أنت مش ميت طبيعي
ولا مطعون م البشر؟!
***
اكتب قصيدة تلم فيها ..
أسامي ناس
سابت في روحك
أي شيء بيبان جميل
بلاش تلوم الذاكرة ..
لو طلعوا ف نهاية المطاف
اسمين وبس
كان الهدف
إنك تحاول تفتكر
قبل الخروج م الكهف
***
أرفع عن الدنيا الحرج
اخرج من الباب العريض
راح تلقى سلم.. أطلعه
ف نهايته سطح..
بسور ضعيف
أسند عليه، واعمل عبيط
احلم بحالة من السقوط
قنعان بآخر لقطة جمعت
كل حزنك بالفرح