سمعت عنى....قصيدة للشاعر / أحمد أسامه

سمعت عني كتير
بين اللي عرفوني
وعرفت عني كتير
بين اللي سمعوني
سمعت إني طويل..
أطول من اللازم
أطول من الفرحة..
وأبعد من المسافات
وعرفت عني حاجات
عرفوها بالصدفة
وفهمت عني حاجات
صادفوها فـ الأزمات
صدّقت إني بخيل
فـ الضحك والأحزان
  وآمنت إني بميل
للبنت دي بالذات
صدّقت كل الناس
إلا اللي حبّوني
فكرهت كل الناس
إلا اللي جرحوني
وجرحت قلب الليل
لمّا ابتدى بيّا
وجرحت قلب عليل
لمّا انتهى بدوني
سمعت عنّي كتير
بين اللي عرفوني
وفهمت عنّي كتير..
أكتر من المفروض
خدني الخيال فيّا
فين ما انتهى جنوني
فاضت حدود روحي
عن وسعها المحدود
واما التقيت بيّا..
لقيتني مش موجود