فى المطعم.....قصيدة للشاعر / أشرف توفيق

فى المطعَم
وِعْنيَّه مْتابعَة إزازة المية المقفولة
الراجعة من الترابيزة
عشان تتحَطّ فْ قلب التلاجة
نفس الجرسون بيشِدّ إزازة جديدة
عشان طالبينها زباين قاعدين
والمجانين
فاكرين ان إيديهم أول إيد تلمِسها
زىّ كتير عايشين
فاهمين ان الدنيا فْ إيدهُم
وان جنابهُم أوّل من بيفضُّوا بكارة العالم
وانّ سِواهُم ناس.. ولا حاجة
مش فاهمين
كلّ اللى بْياخدُوه
هُوَّه فْ أصلُه
بواقى لناس مش محتاجَة
باضحك مِ المنظر واتعجِّب
وانا باشرَب
فى إزازة مية جديدة
مِ التلاجة