طابع دمغة....قصيدة للشاعر / نبيل عبد الحميد

طابع دمغه
و فاتورة نور
و طلب متوقّع م الضامن ..
تكتب بوضوح إسم المذكور
و تسدد في الدور التامن ..
و تقدّم
و محدش ضامن
الخير جاي فين ..
و تجيب طبعاً ويّاك صورتين ..
الصورة الأولى تكون عيّل
لقطوها زمان و انت صغيّر ..
فـ ستوديو قديم
بحيطان خضرا
و ستاره مكانتّش بتتغيّر ..
و بشعر قُصيّر
مفروق ..
و قميصك - كاروهات من فوق ..
و جيوبه الساده
كانت ساده ..
مفاضلش من الصُورة إلاده ..
بعد ما شَعرك
بقى فَرقُه كبير ..
بعد ما خطاويك لفّت ياما
بتحارب عكس المشاوير ..
بعد التأخير
و التبرير ..
و العُمر إللي معدّي ف ثانيه ..
كان لازم يحصل تغيير
يتصوَّر
ف الصورة التانيه ..
صورتين هتاخُدهم م الدُنيا
ترفقهم ببيان الحاله ..
أنا عاذرك
بس عشان خاطرك
الخزنه هتفضل شغاله ..
....
روح كَمِّل ورقك
و تعالى ..