لحظة نقاء فى الروح لله....للشاعر أحمد شريف

.

عندك وبس
برد الشتا مليان دفا
وانا قلبي م الخوف اكتفي
لميت رحالي وجيت اليك
علِّي الاقي ف حضرتك
م الخوف شفا
عشمان ف مكة بطهرها
تقدر توصلني لسماك ...
محتاج بجد أكون هناك
الناس حكولي كتير كتير
بس الكلام غير الحضور
انا قلبي بور
وانت الوحيد اللي ف ايدك تنشله
من مغريات الدنيا وعنادها الفظيع
كل الهموم في حضرتك علي طول تضيع
قلبي كما الدرويش بينده ع الملأ
انا طفل ابيض والذنوب بتذلني
انا جي جري يا ريت يا رب تدلني
تايه ف وسط الزحمة ببحث عن هدي
من يوم خروجي للحياة
نازل ندا
يا رب رحمة ومغفرة
يا رب توبة وحسن موت
يا رب انا خايف أوي
كل الدعاء يذهب سدي
عيل وعارف غلطته
وبيبكي علني وع الملأ
حلمي اندلق
قلبي اتفلق
وانت الذي
عمرك ما رديت الضعيف
مانح لنا حق اللجوء
جايلك يا رب وكلي شوق
عشمان بشدة ف رحمتك
تكتبلي حته ف جنتك
تهديلي قلبي وتملاهولي براح وحب
انسان ضعيف مذنب اوي
ضربه الزمان 60 قلم
عيط قوي و جالك يا رب