جوا الضريح...قصيدة للشاعر / محمد مهران

جوا الضريح
راقد ولي
عاجز لسانه عن الكلام
لكنه رافض أننا
نركع له أو نطلب مدد
وأم الولد
لساها عايشه فــ جهلها
شايله الأمل فوق كتفها
وبتشحت مــ الضريح شفا
ومفيش شفا
مادام كلام المعتوهين
بيخالف الله الأحد
مادام ريالة المجذوبين
بتكتب ع الضريح مدد
يا مجذوبين
مات الولي
يا ست ياللي بتحلمي
فــ يوم تحملي
عمر الضريح ما جاب ولد
يا عم ياللي لحيتك
مسحت بلاط الأضرحة
قوم شد عودك وأتسنَد
مفيش ضريح يقود بلد
يا ماسكين المبخرة
متمتموش
ومتحلموش بــ100 كرامه
من الولي
زمن الخرافات أنتهي
مات حلمنا
ومعاه كمان مات الولي