بعرض الحزن... قصيدة للشاعر / حسام حسين

سلام بعرض الحزن
إهداء للجميع
وداع بحجم فراغ سفر
أمي الحبيبة من الحياة
راح توحشوا الروح ف الغياب
راح تحضروا ف قصصي اللي جاية
عن اللي فات
عن ذكريات
أجمل ما فيها الشعر
واسامي الصحاب ..
ما تزعلوش
كل قطر وله محطة
كل حي وأصله ميت
أرواح ف زحمة بتلتقي
وبتفترق
وكل شيء بميعاد
كانت جميلة التجربة
شباك مثير
الوقت كان تلج بصحيح
بس الدفا اللي صادفته كان
فوق الخيال
يمكن ظلمت الناس
في لحظة اعتراف
وهبتهم وجعي القديم
ردوه.. ورود
حكيت بضغط عن الهزيمة المهزلة
بس انتصارهم ليا
كان فوق الحدود
ممتن للعتمة اللي كشفت شمسكم
كات قد إيه
ممتن للقسوة اللي ورتني بوضوح
إزاي يكون العطف
شاكر لجوعي من الصحاب
قصاد رغيف من حبكم
من لقمة منه.. شبعت
كان نفسي أعمل حاجة
أكبر م النزيف
أدخل لذكرى الناس خفيف
واخرج خفيف
أكتب قصيدة بتبتسم
لجل العياط يخجل
انحت سعادة لأي محروم منها
آخد طريقي وكلكم
بتحققوا الأحلام ..
بأسهل م النفس
على كل حال
هي الحظوظ
دايما كده
آه كنت باخجل اقولكم
أنا كنت واصل في المحبة
لحد فين
طول عمري مسكون ان حب كبير
تملي بينتهي
لفراق عظيم
شبح انتظار
يعقوب ليوسف
يرمي فوق حزنه القميص
مؤلم
وطاعن حبتين
شاكر لفضل اللي احتمل طيشي
رايح ف بحر من اعتذار
لو جرح صاب عابر سبيل
من غير ما احس
على كل حال
راح تعذروا الرغبة المُلحة
ف خطوتين للخلف
وتقدروا ان النص
لازم ينتهي
قبل أما يخنقني العياط
على وعد نتقابل