العيادة....قصة قصيرة للأديب / أحمد الطراوى

توجهت لاستخراج رخصه شخصية للسياره .. وهناك طلب المسؤل احضار شهاده تفيد باننى غير مريض بأمراض العين والبطن ... وعليها .. ركبت تاكسى ..

‫#‏فى_التاكسى‬

انا : بص ياسطى .. انا عايز اروح عند دكتور بيعمل شهادات باطنه ونظر عشان الرخصه .. هو اسمه سعد .. بس مش عارف مكانه

السواق : ايوة ياباشا .. سعد ..ابو عيادة معفنه دة .. الناس بطلت تكشف عنده وبقى متخصص فى الحاجات دى ..انا هوديك لحد عيادته .. وهعمل معاك واجب .

انا : تبقى حبيبى
السواق : بص هو يعرف واحد اسمه الحاج محمود عيسوى .. طول النهار قاعدين سوا ... قوله بس انا جاى من طرفه وهو هيظبطك .. بس متجيبش سيرتى والنبى ..
انا : حبيبى قلبى ..Dont Worry
السواق : لا هو ملوش علاقة بالاورام خالص .. هو نظر وباطنه وبس .. الف سلامه ياباشا
‫#‏فى_ألعياده‬
( العياده يبدو انها مهجورة فى عمارة تشبه عمارات الاشباح .. تجلس امرأءه عبوس ..تبتسم ابتسامه يظهر بعدها اسنان صفراء ..ويبدوا انها تجاوزت ال50 )
انا : سلامو عليكو ..
الممرضه : يالف اهلا وسهلا يامرحب يامرحب .. دة احنا زارنا النبى ...
انا : الدكتور سعد هنا ؟
الممرضه : ياحلاوتك .. ايوة موجود .. ولو مش موجود نوجده .. ياالف مرحب ...والف سلامه عليك .. يادكتور جالنا مريض ...
الدكتور : خلية يدخل بسرعه ... انتى بتسأذنى ؟؟؟ غبيه ..
انا : اذيك يادكتور سعيد
الدكتور : اهلا ياحبيبى اهلا اهلا اتفضل استريح تشرب ايه ؟
انا : ولا اي حاجة ...
الدكتور : لا والله دى اول مرة تجيلى وان شاء الله متكونش اخر مرة يعنى
انا : انا وانت يارب ... ماشى .. لو ضرورى بقى .. يبقى مانجا
الدكتور : روحى يابنتى هاتيلوا شاى .. بس من العروسة اللى انا لسة جايبه .... اؤمر ياحبيبى ... حاسس بأيه؟
انا : لا انا فى الحقيقة مش تعبان ... انا جاى عشان محتاج اطلع رخصه .. وقالولى ,,,
الدكتور : اممم يادى ام الرخص .. هو انا شغال فى المرور ياجدعان ...؟ كل اللى يجى مش عايز يكشف ..معاك صور خلفيه بيضة ؟؟
انا : ايوة .. جاهزين معايا .. ومعايا صورة البطاقة ... بص انا جاى لحضرتك من طرف الحاج محمود عيسوى ..
( يقف على حيله )
الدكتور : يامرحب بالغالى ..حبيبى الحاج محمود دة والله .. والواد ابنه اسلام عامل اية ؟ اتجوز ولا لسه ؟
انا : اتجوز الحمد لله .. ومعاه بنتين زى البقر ...
الدكتور : بس انا سمعت انه لسة متجوزش
انا : ايوة مهو طلق مراته عشان اكتشف انها حامل من مرات بنت عمها ...
الدكتور : لا حول ولا قوة الا بالله ..دايما اسلام دة حظه وحش كدة .. ومنار عاملة اية دلوقتى ..
انا : منار مين ياعم الحاج؟
الدكتور : بنته ياعم ..
انا : اة زى الفل .. لسة والله امبارح كنت مقابلها وهى رايحه السوق وكانت بتجرى فى الشارع
الدكتور : بس اللى اعرفه انها تعبانة وراقده فى السرير من يوم الحادثه
انا : بجد ؟ لا مهى خدت مضاد حيوى 5000 بتاع البهايم دة .. تانى يوم بقت زى الحصان والحمار .. مش نخلينا بقى فى ام الرخصه ..
( يرن هاتفه )
الدكتور : ابن حلال .. لسة جايبين فى سيرتة اهو ... الوووو ازيك ياحج محمود ...
انا : ياختاااااااااااااااااااااااااااااااااى
الدكتور : هو انا ياراجل مسمعش صوتك غير لما يكون ليك مصلحة ؟؟ حبيبك قدامى اهو .. حبيبك مين ؟؟ حبيبك ياعم .. استنى .. اسمك اية ياكابتن ؟؟
انا : ها ؟ نسكويك هوت شوكلت عبد العال ... سلامو عليكو ...
الدكتور : خد ياكاااااااااااااااابتن ...