(1)
جربت تعاتبك وتلومك
وبدال ما تقطع توب الناس
جربت تقطع ف هدومك
جربت تقول ان انا غلطان
ومعفر من ساسى لراسى
انا سيبت جميع كراريس الناس
وبشخبط بس ف كراسى
يمكن فى الآخر الاقى حروف
توصف احلامى وإحساسى
وبدأت أنام من غير كوابيس
ولقيت ضحكاية على مقاسى
جربت ؟
ما تجرب مره تشوف نفسك
وان كان فيه واحد بينافسك
خليه ف مرايتك قدامك
لو عاوز مره تشوف نفسك
جربت ؟
جربت تحلل أوضاعك ؟
جربت تعالج أوجاعك
جربت تصارح روحك بيك
وتبطل بص من الشبابيك
هتشوف ايه بس غير العورات
ماهى كل بلاوى الناس بلاويك
والنبى تتنيل خليك فيك
...........
حمدي موسى