ممكن اطير...قصيدة للشاعر / أحمد شريف

رغم التوهة اللي محاصراني

ورغم ظروفي
هافضل أحب وأبدد خوفي
يعني من الاخر
هتشوفي
واحد ممكن يعمل ثورة
ويفضل قاعد في التحرير
ممكن اخلي كل الشعب
ينادوا بإسمك
( يسقط يسقط حكم العسكر )
ويعيش حكمك
حتي لو جيتي بعفوية
وضربتينا بنار ورصاص
ورميتي الجمهور بالغاز
هافضل أحبك
وهيفضل حبك ألغاز
مش عارف افسر شفرتها
(يا أمورة ويا عسولة وطفلة شقية
وياللي حلاوتك يخرب بيتها )
حبك سر كبير مكتوب علي ورقة بردي
كتبه ايزيس قبل اما يموت ب4 ايام
جات الورقة ف عنوان بيتي
بريد مستعجل م المريخ
قالوا عليها حروب عالمية
مش عارفين يقروا هيروغليفي
أنا خدت الشفرة وفكيتها
وكات الجايزة إن أنا حبيتك
وزي ما صاحبي الشاعر قال ف قصيدة كتبها
إن الإحساس مش كلمات ولا شعر كتير
فمن الآخر
لازم تعرفي إني عشانك
هافضل احب واحب واغير
واني عشانك لو تبتسمي
ممكن أطير