فى عز البرد انا بتدفا بقصيدة
بشد المعنى ع التانى
واحط دماغى بين سيرتك وتنهيده
واربع إيدى على صدرى
أطمن قلبى إن الفكرة دى وليدة
واقول الآلآلآلآلآه ألاقى الآلآلآلآلآه
لأول مره حاسس إنها جديدة
مهياش آآآآآآآآه
دى حاجه حلوة وسعيدة
واسأل لييييييييييييييييه
يجينى جواب
يقول لسه السنه جديدة
هتعمل إيييييييييييه
اقول له ف إييييييييه
يقوللى ف آهة امبارح
اقول له نسييييييييييييييت
يقوللى ياريييييييييييييت
لكن شكلك مهوش مبسوط
اقول له ازااااااااااى
يقول البسمة فيها شك ومريضة
اقول له يا شييييييخ
ساعدنى اضحك على روحى
ماتتعبنيش
وخاللى الشمس تفتح شيش
تلاعب فكرتى بشويش
وعاوز شعرى يحضننى
انا دايخ ما بين سطرين
كأن الكلمة مقسومة على قطرين
وفى اتجاهين
وانا واقف ما بين لاتنين
على طراطيف شرايينى
وبينى وبين
حبيبتى كلمة من حرفين
ومختلفين ومش عارف اجمعهم
ولا عارف طريقهم فين
طب اعمل ايه حبيبتى والقصيدة جروح
ومش مسموح اقلب روحى ع الجنبين
............
حمدي موسى