انا المهضوم لى حقى
انا المسحول على أرضى
انا المقتول وفى بلدى
وشيال الهموم وحدى
انا الباكى انا الشاكى
انا المظلوم
انا اللى صوتى كان عالى
صبح مكتوم
انا اللى بختى كان مايل
من غير كلام او لوم
و دمعى م العيون سايل
على خدى بيكوينى
اهات من قلبى
زى النار بتأذينى
أنا المولود وبيعانى
أنا المطحون ومتمرمط
وخالى اليد
وعمرى ما اشتكيتش لحد
أنا مصرى ومن سينا
وف الاقصر اهالينا
تلاقى كرمنا فى الدلتا ووادينا
ابو اسكندر وبحراوى وشرقاوى
اعز الناس قوى علينا
انا م القناه وليا
مرسى فى المينا
انا صعيدى ومن اسوان
وزارع قمحى فى السودان
وفى الخرطوم وانا معدى
اقابل اهلى فى لبنان
وفى بيروت سلامى
لكل بحرينى
انا دمى فلسطينى
فى غزة يسيل
مالاقى حد يأوينى
وامى اصلها الاردن
وجدى كان من المغرب
على حالى ما تستغرب
دى قصة بس بحكيها
وهتلاقى الحياه اغرب
وسورى الاصل والمنبت
ومن دجلة اروح واشرب
وفى البحرين هناك ارضى
سعودى بخاف على عرضى
بلادى المغرب العربى
من الاقصى بعلو الصوت
بنادى مسجدى الاقصى
ياقدس يا ارض اجدادى
ياعزى وعز اولادى
انا عربى و احفادى
سماري يبقى لون طينى
وارضى هى عناوينى
ونيلى اللى بيروينى
وعرضى شايله فى عينى
ويمنى عندى جوه القلب
كويتى وقطرى من دينى
وبيناتى فى اماراتى
ودجلة والفرات انهار
بتروي الفارس المغوار
بتروي شعبنا الاحرار
ف ليبيا وتونس الثوار
انا عربى
وليا اساس
وليا بدل الدار دوار
***************
محمد عبد العزيزعطا
ياريت يا أستاذ محمد يكون كدا ..هذا الإتحاد والترابط والشعور ..والإحساس ..إحنا لو كدا لا نهزم أبدا
ردحذف