أنا عادي ............. بقلم الشاعرة / عزة الزرقاني

 

انا عادى

ومش عادى

اكون راضى

اعيش شخشيخه
ف ايديكى
انا احساس
وكل الناس
عليا شاهده او ليكى
وعارفانى ..وعرفاكى
وعارفه ايه نواياكى
وفاهمه انى
مش ليكى
ولاقيكى..ف بحر
ومنه طالعه
غرقانه
وبردانه
بنيت ...ليكى
قصور ياما
وفوقتك..وروقتك
وقولت ارسى على شطك
وامشط لك
جدايل شعرك اللافف
على كتافك
منا دلوقتى...مجدافك
ماليش غيرك
ولا ارضى..سوى
شكلك واوصافك
يكون لى وليف
ماهوش تأليف
دا حلم مخيف
الاقيكى ..
بجد بتلعبى بيا
وتطفى الفرحه ف عنيا
أعليكى ..وانتى
تنزلى بيا
دا مش عيبى
ولا عمره ح يبقى
عيب كمان فيا
دا عيب فيكى
وانا ..عادى
ومش عادى
اعيش راضى
اكون شخشيخه
ف ايديكى
عزه الزرقانى