وليه دايما تحاسبينى ....بقلم الشاعر / سعيد شكري

وليه دايما تحاسبينى
على النومة
و ع القومة
و ع اللقمة اللى مقسومة
و ع السكة اللى مابتهداش
و ع الماضى
و ع اللى ماجاش
و ع العمر اللى مستناش
و ع الخطوة اللى محسومة !!

وليه تحاسبينى انا لوحدى
لا كان ذنبى ولا جحدى
ولانكرانى لجميلك
وانا اللى نحتى أزميلك
على الهامش رتوش باهتة
ودمعة تبل منديلك
بتاخد وقتها وتجف
وانا الدايرة
وانا اللى بلف
مستنى الوجيعة تخف
عشان يرجع يغنيلك !!

شوفيلك حل ف التوهه
وليالى التيه
وف الحكمة و ف المعاتيه
وف قلبى اللى عذبتيه
شوفيلك حل ف الغربة
ف قلوب الناس
و ف الكره اللى ماله اساس
وف العالى اللى بات ينداس
على ترابك مادام بعتيه !!

..............

سعيد شكري