العشق بينا
ماكانشي عشق
زي أي اتنين حبايب
كان حياة بتموت في لحظة
لو في حد فينا غايب
العشق بينا
كان سلاسل
نخطف الأشواق بطيفنا
كنا بنكيد العوازل
كان مؤشر حبنا
طالع لفوق
رغم سهم الكل نازل
كل حاجة كات مابينا
ليها طعم وشكل تاني
الأغاني
الأماني
لمس إيدنا
قلبة الوش ف ثواني
العشق بينا
عود ريحان
في صحرا جدبه
نهر شوق
مافيهشي كدبة
كل كلمة من شفايفك
كات قصيدة
كل سهم شوق مابينا
كان بيبني في الجبال
قصور جديدة
والغريب سكناني لسه
أيوا لسه بيا حاسه
كل ماأمشي ف الشوارع
بيناديني صوت حبيبتي
كل ماأهرب بره ذاتي
يتخنق جوايا صوتي
كل ما أنسى اللي بينا
تتوجد لحظة وفاتي
العشق بينا
صبر صبار الجبال
انتظار صعب المنال
القدر اختارك إنت
كنت اية في الجمال
الفراق ماكانشي منا
عمره ماكان اختيارنا
بس كاس مكتوب وداير
حكمة الإله علينا
تسكني إنت ف نعيم
وتسبيني للجحيم
واللي فاضل بعد منك
دعوتي لإله كريم
العشق بينا
لسه ريحته ف الشوارع
لسه حلمه ع البيوت
كل يوم بعدك بصارع
كل يوم بتمنى أموت
العشق بينا
صبر صبار الجبال
انتظار صعب المنال
القدر اختارك إنت
كنت اية في الجمال
...................
عبدالتواب الرفاعي