النار .. جزاء اللي في نيِّتُه قتل أخوه
مش دا حديث المصطفى للمسلمين ؟
طيِّب .. شعار القتل ليه بَقَا ترفعوه
هيا دي شيمة أهل مصر .. الطيبين ؟
فتَحتوا باب .. قُـدَّام شياطين الأمم
كل الدِّيابة اتجمَّعوا قِدروا يفرَّقوا شملكم
زرعوا لكو فكره .. لاجل تشغل فكركم
" السُّلطه " و " الكرسي " ..
ح يبقوا ف صف مين !؟
واتمسِّكوا بالصوت في صندوق الانتخاب !!
أكبر صناديق انتخاب في الدنيا ..
كانت في الشوارع !!
والدنيا شافت كلهــا
والشعب صُوتــه .. ولا المدافع
هي شوارع مصر ديَّا كلها ما تكفِّيكوش ؟
و صوت ولاد مصر الأبيَّة ما هزِّكوش ؟
هو انتو إيه !!؟ ما بتشوفوش !!؟
... ما بتسمعوش !!؟
الشعب قالها يوم تلاتين ع العَلن
إنتم فى فن الحُكم لسه صغيَّرين ..
ما بتعرفوش !!
عاوزين تكون "مصر" امُّكم ..
زى العراق في عهد " بوش " !!
تستقووا ليه على شعبكم بالغرب
و بأمريكا .. ليه ما بتختشوش !!!؟
من إمتى " أمريكا " ..
بتعطى أهلنا بإيدها اليمين !؟
من إمتى كانت تِرضَى خيـر .. للمسلمين !؟
طب هىَّ " كابول " أهلهـــا .. مش مسلمين !؟
خربتهـا .. حد يقول لي رحَمت فيها مين !؟
واحد يكون فاهم ..
يفهِّمنى الخطأ فين والصواب
جايز يكون مجلس شيوخ " أمريكا "
دُول فعلا شيوخ !!؟
و" أميركا " ذاتها اتحشِّمت ..
لبسِت نقاب!!
ويكون " أوباما حسين " ..
ولى وصاحب كرامه !!
و دُعاه لربِّنا مُستجاب !!
طب ليه بيفتح للخلاف والعُنف
جُوَّا مصر باب !؟
وليه يحُط إيديه ..
مع اللى لمصر جايبين الخراب !؟
وليه يقول على ثورة الشعب الأبى
إنه انقلاب !؟
بيفتِّتوا لُحمة وطن
وبيزرعوا فيه الفِتن
ياكُل مصر .. وياشبابنا المسلمين
إصحوا ......................
إصحوا وشوفوا عدو دينكم يبقى مين !!
" أمريكا " جايه تزيح شيوخنا كلهم
من ع الخريطه
علشان " أوباما حسين " يإِم المسلمين!!
علشان " أوباما حسين " يإِم المسلمين!!
.
محمد البسيونى
محمد البسيونى