العلبه دى جواها إيه ..؟! ـــــــــــــ بقلم الشاعر / فؤاد إبراهيم

العلبه دى جوَّاها إيه ..؟!
العلبه دى جوَّاها فيل
والفيل جميل
أبيض مقطقط فى البراءه مالوش مثيل
طيب طيابة شعب بامبوزيا الأصيل
وبرغم حجمه وقوِّته
أول مااطبطب فوق جبينه بينحنى
مخلص قوى وْ بيحبنى
وان شافنى باكل هو يشبع
وان وقعت يشدنى
ويشيل بدالى الهم والحمل التقيل
والعلبه دى جواها فيل
النهر مليان بالقصص
والنار بتحرق فى الجثث
تصبح رماد
يتعبى فى إْزازه
وقلب النهر
يطويها فى رحلة موت طويل
مهراجا انا وبعلن بيان
النهر صافى وسلسبيل
ضفَّاته يحرسها النخيل
لون الحياه على صفحته أكبر دليل
على إننا عدينا أيام الضنا
وبقينا فى الزمن الجميل
والعلبه دى جواها فيل
***
قلب العشش مليان وحوش
طب مين يحوش
والدم جامد فى الوشوش
وماعدش فينا اللى يوارى
حتى سَوْءات القتيل
مهراجا انا
وْ بشهد بإن العصر ده
عصر الأمان
وان الحمام طاير يرفرف ع المكان
يملاه هديل
فى العلبه فيل
***
الفقر عشِّش فى البيوت
آخر نفس رافع إديه
يصرخ بموت
نبض الحياه علشان يعيش
محتاج لقوت
والقوت قليل
فاصل طوييييييييييييييييييييييل
وكأن صوت الجوع عويل
مالهوش صدى شق الفضا
ملقاش ردود
فاصل نعود
آخر بيان
أنا عامل اسْتفتا على نوع اللبان
واللِّب سورى ولا اجيبه من السودان
والشوربه لازم مستكه
ولا كفايه الحبهان
مهراجا انا والحق بان
من موقعى هذا
بطمن شعب بامبوزيا الأصيل
كل الأمانى ممكنه
ومفيش فى عهدى مستحيل
واوعوا تخافوا فْ يوم أسيبكوا اطَّمنوا
قدامكم العمر الطوييييييييييل
ماانا شعبى من كُتر الطيابه
طْلعلوا ديل
كل امَّا بسأل فيها إيه
بيقول لى فيل
حتى اسمعوا
العلبه دى جواها إيه ..؟!
جواها فيل ..
جواها فيل ..
جواها فيل ..
جواها .....