الحالة جيم ..بقلم هالة عماد

أستغفر الله العظيم
صابر أنا
عايش على فيض الكريم
باشحت أمان
علشان زمان
أنا كنت فاكر الهوى
ده شىء عظيم
طلع الهوى قاسى ولئيم
يسرق أمانك
ياخد حنانك
ويختفى
والشرطة يا سيدنا
متحميش مغفل
أو كريم
وانا أصلى أكرم أكرمين
مابحوشى حاجه
عن حزين
ولما خلصت ثروتى
ولما جفت جنتى
قعدت جمبك ع الرصيف
أشكى وبحكى ع اللى كان
ماهو أصله كان
إحساس طغى
دمر بيوت العاشقين
فرجعت أسفل سافلين
لا فيه أمان
ولا فيه حنان
ولا فيه هوى
ولا قلب للحب احتوى
أفلست حتى من جنون العاشقين
وبقيت أنا وحدى الحزين
باشحت أمان م العابرين
ما الحالة جيم
استغفر الله العظيم

.............