طول عمرى وانا ماشى فى ضل الحيط ماليش ف اللف والدوران ولا التنطيط بحط الخطوة ع التانية وابص وارايا ميت مره فى ميت ثانية ولما اوصل لمشوارى أقول الحمد لله ان انا عديت وانا راجع أمد الخطوة ع الآخر ولو واحد زنق كتفى عمرى ما اقوله يتاخر واقبل إيدى وش وضهر إنى وصلت فى الآخر لحد البيت لكن عمرى بقى دايب..بقى مهرى.. بقى بيشيط وبعمل م الرضا رقعة واحل الصبر واعمل خيط وكنت بموت وانا سامع كلام عنى بإنى عبيط وعمرى ما خالفت قانون يقولوا شمال اقول حاضر يقولوا يمين اقول حاضر ورغم انى هموت م الغيظ ومش قادر بقول حاضر إعمل نومة العازب اقول حاضر تقول الكلمة بالراحة أقول حاضر إعمل عجين الفلاحة اقول حاضر فى حبك كنت يا بلدى مثال نادر ومع ذلك بنام مرعوب وافكار سودا فى خيالى لا واحد يجى يمسكنى بتهمة إن انا ف حالى وفجأة قامت الثورة وفج النور وخرجت ناس كتير ياما كأنه بعث وقيامة ....... ونفخ الصور وهل الصبر ببشاير ودمى الحر ف عروقى اللى كان باير صبح فاير وحسيت ان انا إنسان وانا ثاير وضحكة مصر أجمل ضحكة ف يناير وبطلنا نكت بايخة ورشينا على وشك دماء شهداء عشان ما تفوقى يا دايخة واقسمنا يمين الله نخليكى شباب تانى ولا تبقى فى يوم شايخة قعدنا شباب ورجاله بكل هدوء وقلنا الكعكة تتقسم وكله يدوء وانا كنت الحكم بينهم عشان اسمى اللى كان مشطوب طلع زينهم ورأيى هقوله على كيفى ويمشى غصب عن عينهم وانا اللى من هنا ورايح هغير فى موازينهم انا المقتول بجيب تارى انا اللى رجعلى مقدارى انا اللى هحدد السكة وانا اللى هسوق انا بفهم ومش قاصر وليا حس عالى وذوق وعمرى هطبقه بإيدى واحطه بنفسى فى الصندوق عملنا استفتا وانتخابات وجيبنا رئيس وعارفين أصله من فصله وكله كان على عينك آدى حاله وآدى شأنه وانا اختارته عشان دقنه لكن الصبر راح منا ... دخل إبليس لعب فى دماغنا جننا رفسنا النعمه والمنه طفينا الشمع والفوانيس وبعد ما كنا شئ واحد بقينا اتنين قابيل وهابيل ياعم قابيل ده حظك وده بختك أنا أحسنت قربانى... معاك اختك قتلنى قابيل وفاكر انه من غيرى يشد الحيل وانه لما يقتلنى ودمى يسيل هموت تانى ياناس مهابيل .... لسه ف وسطنا عايش واسمه فى السما السابعة ولو عاوز تقابله روح هناك فى النهضة او رابعه معادشى ينقتل تانى ...مينفعشى هتدهسنى بدبابة... هيرجع يقتلك نعشى ولو هتجيبلى الف شفيع غير عمرى اللى فى الصندوق ...ميشفعشى هنرجع تانى م الأول.....مابرجعشى أنا ايه اللى يضمنلى واحد قاتل وقطاع الطرق حواليه أصدق ليه؟ حلمى خلاص راهنت عليه ولو عاوز تموتنى انا جاهز واهو انت معاك أداة الموت أموت محروق.. أموت مخنوق .. أموت مشنوق أموت صايم...أموت ساجد... أموت راكع مفيش مانع لكن نرجع مانيش راجع مانيش راجع مانيش راجع .................................................... حمدى موسى
