الصبر اللى عرفته معاكى....مهندس.عطية شواش

الصبر اللي عرفته معاكي

أبدآ.. أنا عمري ماشفتوش

والشمس اللي بتملا سماكي

نهشت قلبي كأن وحوش

والعمر اللي رميته ف غابك
وانا قاعد مستني غيابك
واحد من عاااااااااالم علي بابك
عمري ياعمري ماجربتوش
الواحد بيحارب واحد !!!!
مش واحد وقصاده جيوش !!!!
مش فاهم مين اللي رماني
دنا كنت الاول والتاني
وانا كنت الطالع والنازل
دلوقت القلب بيتنازل
وانا كنت الفارس بحصاني
مش عارف مين اللي عداني ؟؟
علمني الشعر وسكناته
ونزلت السلم درجاته
وضلوعي اللي العمر ناسيهم
صحاهم من بعد ما ماتوا
وانا قلبي اللي مكانش ف بالي
بيرفرف ويصحي اخواته
القلب اللي بيدعي تمللي
يدن دايمن .. وانتي تصلي
يعصر لك من نبعه فراوله
يرمي ف حجرك وانتي تحللي
القلب اللي يداري عزولك
ويزيح الايام لتطولك
يعمل لك م البحر طحينه
ويجيب السكر لخيولك
القلب اللي يفك ضفايرك
ويحط الالماظ ف زرايرك
وبيعمل م الورد قطيفه
تتعلق دوران ف سرايرك
القلب بيبنيلك عشك
يصحي الفجر ويغسل وشك
ويحضر م الشمس فطارك
يتنفس من عطره يرشك
القلب اللي بيحكي حكايه
يمسح ضهرك يبقي مرايه
وبيضرب بالسيف الحامي
وبيقطع راس الحدايه
شفتي لما خسرتي قلبي خسرتي ايه ؟؟
الحكايه البرتقاني
والنسيم الارجواني
والندا يغسل ايديكي
والفواكهه في الصواني
تعمل ايه ... اسكت ياقلبي
كل طير في جناحه ريش
مهما تفرش له ف جناحك
هو عارف فين يعيش
إنت حبيت قلب خالي
لما جالي .... محبنيش

......................................................

                                                               م. عطية شواش