مش أنا ....بقلم الشاعر / حمدي موسى

ان كنتى فاكرة ان الغياب هيهزنى
لا مش أنا
انا نخل ومحيلتيش رطب
والريح بيطلع روحها فى طريق الوصول
تقعد لها يجى ميت سنه
وان كنتى فاكرة ان العذاب هيهدنى
لا مش أنا
انا ميت جدار
والخضر مستنى إشارة من صباعى
عشان يخبى الحب
لطلوع النهار
وان كنتى فاكرةان الشيطان هيوزنى
لا مش انا
ساكن على شمالى ملاك
ساكن على يمينى ملاك
شايليننى متن وعنعنه
وان كنتى فاكرة ان الطريق هيردنى
لا مش انا
انا عندى اتوه واروح بلاد من غير بشر
وارجع لجدى الأول العاشر عشر
ألبس رقع ولا أى شمس تلمنى
وان كنتى فاكرة الشعر لعيونك دنى
لا مش انا
ولا شعرى ممكن ينحنى ولا يتنتنى
انا اصل شعرى مش كلام
انا شعرى فرض
شعر طول العام صيام
وزكاة بتطلع كلها للمحرومين
انا اصلى شاعر بالمشاعر ميت غنى
فابلاش تظنى إن بعض الظن إثم
انا اصلى فوق الظن وابعد م الشكوك
انا اصلى راجل مختلف
فى الحب ماشى مستقيم زى الألف
وماليش طريق غير اللى قلبك يعرفه
متجربيش
كل الطرق مسدودة آخرتها البعاد
قولى لقلبك ينتظر
يرجع يلف

.......

حمدي موسى