أخويا الأول البكرى دا كان اول عبيد الأرض ولا فكرشى إنه يثور على سيده بعتلى صورته ع الجدران على ضهرة حجر صوان وماشى وراه واحد قاسى عديم القلب عينه الحمرا عماله تطق شرار وبيقوله بسرعة شويه يابن الكلب اخويا الأول البكرى بنى أهرام بنى مسلات وهو موطى ومطاطى سعيد بالغلب اخويا التانى كان فنان كان رسام كان نحات وكان شاعر رسم سيده وعمله طاووس يوطى يبوس على إيده ويضرب له سلام مخصوص ونحته إله وخصص له دعاء وصلاة وقال الشعر فى عيونه وبرر جهله وجنونه كتب دواوين وأغانى صنع بالخوف تاريخ تانى وخللى الروح تمس القلب بالسخرة بنينا اهرام كتبنا كلام عبدنا الجهله والأصنام وبالسخرة حفرنا قناة ولاحدش فتح بقه ولا قال آه جينات خاصة متتغيرش مخلوقه متتأثرش بالتحديث وموجوده فى كل كتاب فى كل حديث خصائص تنتقل بالدم سمات منقوله بالتوريث صفات ثابته كما وصف السواد لليل متتغيرشى إلا بانقلاب كونى بردم النيل بتدمير الهرم لاكبر بهدم معابد ابو سنبل بتحويل اتجاه الشمس عن رمسيس بإحراق الكتب والبردى والقراطيس وإغراق شعب اتعود على ذله وعاش ع ا لرعب ولو كان انتحار الدنبا ده شئ صعب يبقى لابد اسرة جديدة م الفراعين عشان نكتب اسامى ولادنا ع الجدران ونصنع عجله حربية ويبقى عندنا أسرار ولا نخافشى من استعمار ونبقى شعب متقدم وشعب حويط عنده علم بالذرة وبالتحنيط ونبقى كلنا أحرار فى قلب سجون ومهما يكون ماهى عادتى انا من إمتى عيشت الدنيا بإ رادتى انا عمرى ما شوفت الدنيا بالإتنين أمانى وأمنى وسعادتى يا مولايا انا عبدك عشقت الذل بناديلك.... نيابه عن الجميع والكل تعالى احتل افكارى وخد دارى تعالى العب ف افكارى اقتل فيا كل ملامح الإنسان لكن ناولنى فتفوتة وسكة أمان وانا ابنيلك واغنيلك ووريك بكرة شكلة ازاى لكن لابد تسحلنى تبهدلنى وتمشى ورايا بالمركوب ولو عصلجت احبسنى أو اقتلنى انا مبدع وانا مرعوب واسرق كل أموالى ماهو يا سيدى الوالى انا ملكك تورثنى انا مالى تجرسنى انا مالى انا أحلامى من إيدك إلى إيدك انا عبدك منيش سيدك انا طبعى تعذبنى أقوم ابنى تصهين عنى وتسيبنى أشخبطلك على الجدران وادمر حلمك الوردى واقطع ورقة البردى عشان طينى غريب الطين وتكوينى ماليش تكوين انا مصرى ماليش دعوة بكل الناس انا بعلى وانا منداس واشد حزامى على خصرى واغنى تحت نار الذل واتريق على الأحرار انا لا ليا فى الثورة ولا الثوار انا بانى على شط الخضوع قصرى انا المصرى ............................................... حمدى موسى
