عين وعين.... بقلم الشاعر/ حمدي موسى

الشعر قاللى خلاص كفاية
تعبت من قولك لها
توهتنى وسط البحور وسط السطور
بين المعانى كلها
فيه غيرها محتاج الكلام
هيه خلاص وصلت لآخركلمتين
مال الميزان على بختها
كل المشاعر بوخت
فقدت حنانها ودفئها
ليك الخيار
يا إما تنسى صحبتى
يا إما تنسى حبها
.....
أرجوك يا صاحب سكتى
ماتسيبش قلبى بين نارين
انت عارف ان انت صاحبى
وبرضو عارف هيه مين
عمر الخيار أبدا ما كان بين عين وعين
.......
خلص الكلام
جوايا اكتر من هوى
جوايا غيرها كتير أوى م العاشقين
زادت على كتفى الحمول
ومشيت معاك
تقوللى قول ف عنيها اقول
تقوللى قول ف خدودها اقول
وصلت آخر شطرة فيا
تعبت صاب حرفى الخمول
عاوز نفس
ضاع الربيع من سكتى
اتمرمطت كل الزهور
كل العطور بين الفصول
.........
قلبك قسى
وبقيت ياشعربحب غيرى..بتنكسى
آخر قصيدة ف حبها
آخر قصيدة يجوز تحصل قلبها
جواك معانى لسه موصلهاش قلم
عارفك مخبى كلمتين على جنب
من غدر الزمن
إدينى منهم كلمة واحدة
اكتم بها صوت الألم
.............
اكتب لها من غير قوافى أو بحور
اكتب لها من غير موسيقى أو بخور
اطلع لها فوق أى سور
اكتب قصص
مش لازم المعنى البعيد
مش ضرورى تجيب لها فى الشهر عيد
مش عاوز اخونك واخدعك
واقول لها إنك سعيد
..............
يعنى ده آخر كلام
تحرمنى من آخر نهار
تقف لشمسى بضلتك
فين العشم فين السكينة ف طلتك
من النهاردة خلاص كدا
سكتى غير سكتك
..............عاجبٍك كدا ؟
خسرت آخر خطوتى
وقف الزمن...لزقت شفايفى ف بعضها
تاهت ملامحى ف شكلها
والحزن قطع ضحكتى
عاجبٍك كدا ؟

..........

حمدي موسى