كل واحد منا عنده
الف دمعه بين ضلوعه
واحنا بين صابر وراضي
أو بيسخط ع القدر
وجهة نظر
الصبر واجب ع البشر
لكن ساعات اكبر خطر
لو حق مات
لازم نثور
لو فرع مال
لازم فى لحظه ينكسر
الذنب أصبح مفردات شاعر
وكاتب
انكتم صوت الضعيف
والدمع سارح ع الجيران
والخوف طبيعته شئ جبان
اما الأذان عابر سبيل
والدنيا ليل
الخوف حرام
لكن ساعات بيكون رجاء
الإلتزام
قصدي النظام
بعد التحيه والسلام
العمل ضد الكلام
يا إمام
الدمع بحر الكل عام
وفى كل عام
شم النسيم
شغل الحريم
البغل رافض يعترض
حامل فساد
حامي البلاد
لك منا شكر المرحله
ثبت صنم
الكل وافق ينهزم
علشان يعيش
الديب بيرضع من معيز
والثدي جف من الغضب
الكل ماشي يهز .....
والأسم قال ابن العرب
كداب يا بكرا لو تخاف
الحلم واضح في الهتاف
الدمع أعلى من كتاف
إبن الهرم
لكن مازل فى الله امل
الدمع نار
لكن كمان زي العسل
يشفي أهات المجروحين
الضاد خلاص
اما الدولار اصبح اساس
القرد نام والنمس هاص
أكل الحمير
وسط الغابات
الدمع عاد
والحزن زاد
والصمت عيب
لحظة أذان النصر
رددنا الغناء
ونسينا إن العلم نور
والرقص من فعل النساء
الدمع أكتر من مطر فصل
الشتاء
..............
ضياء الإدريسي