وجيت بدموع......أمير مخلوع
وقطعوا الحبل م السرة
وكتبوا ف الخلاص موجوع
وفات اسبوع
وقادوا شموع
وآخر شمعة بتروّح تكون الإسم للموضوع
وف الغربال يمين وشمال
عشان آخد على الترحال
وخطونى سبع مرات
ورشوا الملح ع الستات
عشان العين
وحانت لحظة التلقين
عشان اسمع كلام امى
وابويا ابقى اسمعه بعدين
وانا كل اللى حيلتى دموع
بصوت مسموع
ويفتكروا البكا م الجوع
وانا بابكى على الشمعة
وعلى إن الخلاص مقطوع
عشان رافض طريق البرد والغربة
طريق واحد تلاقى آخرته تربة
طريق رايح مفيهشى رجوع
ولكن جيت
زحفت...وقفت.....قمت مشيت....ثبتت جريت
ولسه باجرى والخطوة كمان بتزيد
ولسه التربة مشتاقة وفارده الإيد
بتندهلى..وانا رايح
وقبل ما اروح بترجع فكرة التلقين
عشان اشهد بنوع الدين وربى مين
وترجع تانى تيجى دموع
وموت الشمعة يتجدد
بموت الإسم والموضوع
...
حمدي موسى