لأنك نبض وجداني
مفارقاني و عيشاني
لأنك مني سكناني
لأنك في حروف اسمي
بتبتسمي
و لو شفتي في يوم دمعي
أوااام تبكي
و لو قالوا البنات شربات
علي عيوني أوام تحكي
و ربيتي و كبرتي
و هنننتي و فرحتي
و لا مرة في يوم تشكي
جبل
جبل واقف ميتهزش
فراشه مزينه الدنيا
و أنا!! أنا بستانك الأخضر
يا قلب عمره ما اتكبر
و غير الحق ما بينطقش
مثال العفه يا أمي
كمال الطهر
و أنا بكبر و حبي ف الحشا
بيكبر و لا بيصغرش
يا ست الكل :
يا اللي الجنه ف اعتابك
و حرف الكلمه
متزين بلون شالك
ضمير صافي
و لما الكل علي بابك
لا بتلومي و لا تعاتبي
و لما اغلط !
بكل الحب بتحاسبي
لأني كل أحبابك
مليش غيرك صديق تاااني
و لما أئن و أعاني
تكوني بلسمي الحاني
ما أنا من أصل تكوينك
و أنا الضي اللي من عينك
و أنا الفرحه اللي بتفرح
و أنا اللي دمعتي تزعل
و دمي يحيي شرايينك
يا ست الكل:
ياللي الكلمه منك
تاااج علي راسنا
و رمش عينيكي حراسنا
بنتباهي و نتزين و نتعايق
قصاد الكل
يا عقد الفل
يا عقد الفل وحشاااني
و بتمني تجيني حتي ف منامي
و مين تاااني
يشيل همي و عليا يطل
يا شمس منورة زماني
و نور للكل
فأنا الذي و أنا التي
شابكه عناقيد الفرح
من ضحكتك
راسمه علي جبين القمر
نووور طلتك
غازله بطاعتك جنتي
من جنتك
أصلي الفرض
و ختامي يكون دعوتك
يا ست الكل وحشااااني
و وحشني حضنك الغالي
و وحشاااااااني كتير كتير كتير
حنيتك
وحشاني يا ست الكل
........
جهاد زيادة