وشوشتنى ..
فكسرت عضم القوقعه
وطلعت لك
عارى البدن
منهوك من الاعياء
ماعرفش كنت من اللى ماتوا
واللا م اللى ماأصبحوش أحياء
حلمات ودادك مدت الخطوه
فقاقيع هوى اندلقت فى مصارينى
فبدأت احس بتفريعات النيل فى شرايينى
وبدأت احبك موت
ولازلت بعد الموت
بفارغ صبرى بانتظرك توافينى
بصحبة ورد
وتقرى الورد
لعل الشاهد الواقف على قبرى
بأذن الله يواتينى
أشم شذى الورود فى ايديه فيحيينى
أكسر فيه عمود فقره
واعدينى
أجيلك لجل اقدم لك
حياتى وبعض دواوينى
ودواوينى
قصار قصايدها أحيانا بتشجبنى
ومهما اكتبها تشطبنى
لابازعل منها ولابافرح
وباعزى العيب ساعات ليا
ساعات باعزيه الى المطرح
ومطرح راسى مابتتحط
أكيد تتحط رجليا
اذا انحرفت عن الخطوه اللى مرسومه
فبابعت غنوتى لثومه
متتغناش
عشان ثومه
زمنها ماجاش
أحاول تانى ماكتبشى
وارد الباب
فيفتكرونى أولادى
مانيش صاحى
وينزلوا رقص على غنوه ف شريط كاسيت
لعمرو كباب
برغم انه
بيفرق بس عن بيفى انه بيغنيش
وتفرق بيفى عن عمرو انها مابترقصش
فتتطرق بنات بلدى لشئ ناقص وأيما نقص
فى علم الرقص
وتتهز البلد بينا
فتطربنا
وندعى يديم علينا المولى مطربنا
ومطربته
وأيه تانى
مانيش قايل
اخاف من قولى لو قلته
يقوم مايل
مايعدلنيش
خلاصة القول عشان مااهذيش
بلدنا اتمدنت جدا
وديكنا ماعادش بييدن
وتلقانا
لاأقصانا بيسألنا
ولابنسأل فى أقصانا
ومع ذلك
مافيش ولا حاجه ناقصانا
فيا تروح
ياتطلع بره قفطانك
وتتسوح
يامولانا .
.................
علي جامع