كله عارف
بس كلمة واحدة منك
تقطع الشك بيقين
وانتى خايفه تنطقيها
طيب ازاى هتطيقيها
تنحرق جواكى تبقى
طوبه حمرا روحى فيها
تبنى بيها حيط حزين
ماتقوليها نعلا بيها
تنكتب فيها الأسامى
تنحسب بيها السنين
إعلنى رؤية هلالى
بكرة أول شهر حب المحرومين
افهموا لو مؤمنين
يالا صوموا...يالا قوموا
القيام ف الحب دأب المغرمين
كلمة واحدة بس منك
تقطع الشك بيقين
والدعا ف الحب جايز
والقبول للعاشقين
فسريها من صحيح قلبى اللى حبك
واشرحيها من كتاب العارفين
اللى سهروا زى ليلى
واللى وصونى ف هواكى بشد حيلى
واللى قالوا آه يا ويلى
من عنيكى المجرمين
كلمة واحدة بس منك
تقطع الشك بيقين
اللى سابب دينى كافر
واللى رافض انى اسافر
للطواف حوالين هواكى
ابن مين
ابن حوا ولا آدم
اصلى شاكك ابن مين
اللى مش مؤمن بحبى
واللى مش حاسس بقلبى
يبقى دينه أى دين ؟
يبقى عاشق ولا سافر ؟
يبقى ناقص له حوافر
يبقى شئ بس بعينين
كلمة واحدة بس منك
تقطع الشك بيقين
انطقيها..اكتبيها...ارسميها شاورى بيها
وصليها بأى معنى
طوّحيها باليمين
عرّفيها بالألف واللام وإسمى
كبريها بحجم جسمى
واصلبيها ع الجبين
علميها تبقى حرّة
احتويها بحضن مرّة
تبقى بارّه...بالمشاعر أجمعين
كلمة واحدة بس منك
تقطع الشك بيقين
حمدي موسى