عمال ترسم
صبحك
بالطباشير
من غير أمشير
من غير شتا
أو نوآت
وبتختار الأوقات
علشان تظهر
عـ المسرح
وترص الأحلام
قــدامك
وتطلع لـ الحزن
لســانك
خايف مـ الشمس
لـ تقطـع
في حبـال الصبر
الدايــب
خايف تطلع
فـ الآخر
من غير نايـب
خايف تاخد
دور البهلول
الخــايب
خايف ترسم
قصرك
يعرف فرعون
ويحاصرك
حارب لو متأكد
من نصـرك
حارب علي حلمك
لو هتمـوت
اكبر من موتـك
إنك تفضل
في سكـوت
وأرسم صبحك
من غير خوف
واحجز كرسـي
البنــوار
ومسير الصبح
يفتح زي النوار
وتلاقي نهـار
طارح في بلاد
الكفــار
وساعتها تـحس
بـ طعم النصر
وهزيمة فرعون
الجبـار
وهزيمة فرعون .. الجبار !
...............
الشاعر / أشرف الشناوي