إزى الصحه..؟؟
ياوزير الصحه..
لو عندى ريحتها..
إنشالله أطفحها..
ودماغى ف توهة..
ضايعه فـ مطرحها..
سُكر ومرارة..
وفلوس ياخساره..
تاهت فى جيوبكوا..
والإسم شطارة..
والناس بتموت..
مش لاقيه القوت..
وف ذل ودوخه..
والهم جارحها..
أنا حقى يكون..
تعليم وعلاج..
مابقاش مركون..!!
عايش محتاج..
وفلوس الدوله..
مين بيها الأولي..؟
طلعتم روووحنا..!!
طنطيط ومزاوله..
وعيانا تجارة..
سمسره ومقاولة..!
وأدخل بمرض..
أطلع بإتنين..!
وعشان ماأدوخش..
أدفع قرشين..
ويقولك شاي..!!
طب تيجى إزاااااى..؟
وأهو برضه بدوووخ..
والصحه خلاص..
سافرت بصاروخ..
وتعبت ياناس..
والروح بترووووح..
والفقر أصيل..
دايما بيميل..
علي ناس بتشيل..
حُزنها شوالات..
والهم تقيل..
والمُر كاسات..
والجرح سنين..
والفرح ساعات..
والصحه حديد..!!
طلعت إشاعات..
وإتفتحت أبواب..
المتاهات..
والناس فـ همومها..
تقوم وتبات..
وإنت يادكتور..
إزاي الحال..
مش برضه الصحه ..
دي عال العال..؟؟
وضميرك معمول له..
إستئصال..
طب عندي سؤال..
إرتاح البال..؟؟
طيب سماعتك..
سِمعتنا..؟؟؟
والمشرط إللي مشرحنا..
حس بأوجاعنا..
ودمعتنا..؟
يعني من الأخر..
حسيتنا..؟؟
أنا يظهر خرفت..
زياده..
محتاجه 200 الف عياده..
أنا آسفه..
لكل إللي أنا قولته..
كالعاده مريضه وبزياده..
تقريباً كده حاسه بكُحه..
زعلانه إن محدش قالي..
إسم الله أو إزي الصحه..
..
بقلم : ولاء عدنان