النبوءة ..بقلم الشاعر الكبير / جابر الزهيري

عراف قديم
كان قال لي و انا عيل زمان
( لما الوقار يعرف طريقه لسحنتك
ابقى افتكر
في الوقت دا لازم هاتحصل معجزة
ما تقولش زمن المعجزات
راح و انقضى
لأ يا ابني مش شرط انك انت تكون نبي
ياما بشر مش انبيا
طلعوا الفضا
فاهمني و لا اقول كمان )
قلت له فاهم
بس ليه
سابني و مشي
و كلامه بيرن ف وداني
حرف حرف
ابقى افتكر
أبو زيد دياب راح يقتله
و المهرة هاتفك اللجام
و بإيدك انت هاتفتله
و السكة هاتضيق
تخنقك
دا طريق لابد تكمله
إلا إذا.................
ربك يعجّل بالفرج
و تتم يا ابني المعجزة

******
العمر ماشي مع الكلام
ما اعرفش ليه انا مانسيتوش
و لا تاهشيمني ف زحمة الأيام
و مات
عدّت سنين التلمذة
و بدأت مشوار التعب
و الحرف لساه ف الودان
يا رب عجّل بالفرج
نفسي أشوف إيه اللي ممكن يبقى ....لأ
دا كلام عبيط
الغيب ما يعرفهوش بشر
و الراجل اللي حكالي مش واعي بزمن
كداب
منجّم
و ل يمكن كان بيستنى التمن
انسى يا واد
و الصوت يرن
ابقى افتكر
و اهي جت سنين الأستذة
و شوية العلم اللي كانوا ف رزقى بقيوا
رسالة للجيل اللي جاي
صوتي اتنبح
و الصحة بدأت تشتكي
م النرفزة
قلم الزمن
غيّر خريطة الوش يمكن مرتين
و الشيب بدأ
يرمي خيوط فجر النهاية ف سحنتي
و الهم زاد
و الدنيا من كتر الهموم ضاقت قوي
ضاقت و لما استحكمت
زادت ف تضييق الخناق
و الصبر ضاق
و الصوت ف حشرجة الدموع
محبوس ف زنزانة سكات
يا رب غاب ليه الفرج
من صغري مستني المشيب
ابقى افتكر
فاكر
و حبل العلم فاتله من زمن
فاكر
و ماشي ف سكتي
رغم الأفاعي ماهمنيش ايه التمن
فاكر يا عم
من يوم دياب ما ادي الإشارة الدنيا مافيهاش مؤتمن
فاكر ياعم
يا ريتني ما سمعتك زمان
يا ريت ما كان كل اللي كان
دي الكلمة محبوسة ف سراديب القلق
و أبو جهل من سبعين سنة
فارد عبايته ع الورق
ما بيديناش غير السكات
نتسلى فيه بالقزقزة
ابقى افتكر
إلا إذا
ربك خلاص جاب الفرج
أبو جهل مات
و قريش و كفارها الكبار
واقفين بيتلقوا العزا
..............
جابر الزهيري