فى تفصيل الكلام للقول
بيبقى الرك ع الفكرة
ولما تكون صحيح خياط
بتعرف تلضم الإبرة
تلاقى الغرزة تتماشى مع المقطوع
تلاقى اللفظ فعلا طوع
كتابة الفكر مش وقفة على الناصية
ولا نظرة على الماشية
ولاصفاره فى الممنوع
صياغة الحلم
مش لازم تكون ملطوع
على باب الحروف صايع
صحيح الحلم مش ممنوع
لكن برضو الأمل بشويش
وانا فى الشعر متخرّج من الدنيا
دخلت الجيش بقيت ظابط
وكنت فى مركز التدريب مع شاعر
فاعلمنى الصفا للبوح
ووقفنى انتباه للروح
فا من يومها منين ما بروح وانا صاحى
وواقف خدمة ع الألفاظ
بحامى عن حدود الحب وبدافع عن الإحساس
يا خلق يا ناس
صحارى الشعر محتاجة مياه النيل
وعاوزه فلاحين مجانين
من الدلتا وم الوادى
بنزرع شعر لبلادى وللدنيا وللآخرة
بنزرع حاجة مفتخرة
تلم الكون على بعضه
ماهو احنا اصلنا مهابيل
نجيب الشمس عز الليل
وبنعد النجوم الضهر ونسلى الصيام بالآه
وبنذاكر ف خلق الله
ونتفرج على روحنا
مسلسل كل يوم ينعاد
ماهواحنا أصلنا مجاريح
وانا مفتون بسيف الشعر
وباحارب جيوش الريح
بموت ف اليوم ميتين مرّة
وعمرى ما ندفنت صريح
ولا يقدر يتاوى فرحتى إلا
قصيدة شعر
والشاهد علىّ........ ضريح
ولما الفكرة بتعاند وترفع راية العصيان
بسافر خارج الجتة
وبلبس فى بدن تانى
صوابع إيدى فيه ستة
وفيه العمر بالمجان
وعينى تروح وراء الكون
اشوف جبريل بيدى الشمس سر النور
واقابل كل يوم موسى فى جبل الطور
واهاجر من ديار مكة أروح الصين
ماهو احنا الشعرا مش عاقلين
ومالنا احنا ومال العقل
طول ماحنا كده فاهمين
ومش عاوزين عقول ضالة
ترجعنا ورا بسنين
ولو نتخيل الدنيا بدون شاعر
فامين يرسم لنا عيسى
ومين يوصف صلاح الدين
ومين هايحرر الأقصى
ومين هايصحى ف قلوب البشر
صبرا وشاتيلا
ومين هايطمن الدرة بإن اخواته ف فلسطين
ومين غيرنا هايحيي ياسين
ومين غيرنا هايملا الخلق بالميادين
ومين غيرنا هايعمل ثورة كل ربيع
لذلك تطلع الفكرة من الجب اللى فيه حالم
فايبقى عزيز
وتطرح مصر فى الآخر دهب ألوان
وتصبح مصر موجوده ف كل مكان
وتبقى الكعبة مليانه ف كل آدان
ويبقى الحب ف الأسواق
فادى الفكرة وده المعنى وهذا الداء
فيا شعراء...........وحشتونى
فهاتوا الشعر وادونى..... وودونى
أنا مشتاق
.............
حمدي موسى