يجوز جدا فى موقف ما
يكون شعرى مهوش يعنى
نتيجة شئ بيوجعنى
فاتسمعنى ومتعلقشى من فضلك
وقول مثلا أكيد معذور
ومش ممكن يكون حمدى أصابه الدور
ماهو انت عارفنى من مدة
ولا بغلط ولا باشتم
ولا ف ضيقة ولا ف شدة
لكن قوللى بحق الله
ساعة لما يقع حيطك
وفجأة تلاقى أحلامك ف قرب الفجر عريانة
وكل الناس بقت شايفه قصيدة شعرك المستور
ودريانه بكوم لحم المعانى
ال حتى مش لاقيه حماية سور
هتعمل ايه ؟
طب اوصفلى أحاسيسك
ساعلة لما البيبان ترفض ترابيسك
وماتحسش بأى أمان
وما يكونشى لا ليك
ولا إسم ولا كونيه ولا عنوان
ولا حتى ينادوا عليك بيابو فلان
يكون اسمك ما بين الخلق
ياسمك إيه
وقولك إيه ؟
ساعة لما تلاقى الكلمة مع شاعر
واخدها وماشى مش ف النور
تنادى عليه؟
وبالذمة تحس بإيه ساعة لما تكون فارس
محاصر من دياب ونسور
وفجأة ينكسر سيفك
فياخدوك الكلاب مأسور
تحارب ليه ؟
شعورك إيه وروحك عاوزه تترمم
ودم الفكرة متسمم
وبرضو انت اللى بتصمم
تكون شاعر وتتعمم
بكل مكارم الأشعار
مكارم ايه ؟
هتعمل إيه وقطّاع الكلام كتروا
ورضّاع الحرام كبروا
وصنّاع الضلام صبروا
وفتحوا دولة الوطاويط
تعيشها عبيط ؟ وتستهبل ؟
وتعمل فيها مش فاهم
ولا تهشش ولا تنشش
تلاقى الأسئلة صعبة ومتغشش؟
ولا تكشش ف عز البرد من طوبة
ولا تخشش ف أيها ورقة مشطوبة
يجوز تلقى حروف اسمك
وتعتر فيه
وينقال الجدع شاعر
وشاعر إيه !!!
ولامؤاخذة ؟
لذلك شعرى فيه وخزة
شيطان الشعر جوايا
لاهو بيكنُّ ولا يخزى
لأنه شيطان لسانه طويل وحقانى
شيطان مش زى أى شيطان
شيطان تانى
لذلك قلمى مؤمن بيه
فاسامحنى إذا مرّه لقيتنى بقول
كلام فارغ
آدى حال القصيدة ساعات
تكون مش لاقيه بيت تبنيه
......
حمدي موسى