سهران مع أصحابي اللي بيهم
باقتل الدمعة اللي ساكنة ف غربتي
ورقة و قلم
و كلام كتير
مسقي بمرارة وحدتي
دخان سجاير
باحرق الهم ف دوايره
لما تصرخ لوعتي
فنجان مصاحب حنضل البن اللي فيه
مع إن ايده اتكسرت من أسبوعين
راديو قديم
ما بيشتغلش إلا على صوت العرب
و جنب منه كام كتاب
و من الرطوبة مكرمشين
ورداية من عشرين سنة
ماتت على سطر ف كتاب
اسمه النصيب
يتجمعوا
لو يسمعوا تزييقة الباب
و ابتسامتي للصديق
اللي مقابل خطوتي
بوصلة طرب
نقعد سوا
و نحكي ع اللي ما شوفناهوش
مع بعضنا
و اسمع تراتيل الجمل
من بين كلاكسات الطريق
مليون ديوان
و اسهر كمان
ارسم ضفاير بنت عاشقة الشخبطة
بالأمنيات
على قلب سكران بالشقا
و ارسم جفون
الدمع فيهم بيناديني
ارجع بقى
و ارسم رموش
ارسم عيون ..
ارسم جبين
خدين ..شفايف يبتسم ليها القلم
و لما يغلبني اشتياقي للقا
بافرد مشاعر
كام قصيدة كتبتها بضي النجوم
علشان اشوفك
جنب مني ف محنتي
ويا الصحاب
اللي بيسعدها ابتسامتك
ف الصور
...............
جاير الزهيري