بيع اراضــينا
وإعـمـــل فينا
اللى بيحــلالك
ما احنا حلالك
واحنا رضـينا
لمّا طلبنا
ف مرّة وصالك
وبعد ماضاقت بينا العِـشـــرة
ودهبك بان لنا فعلاً قشــــرة
لسه فى نــــاس
عاشقين احوالك
ومــوافقينك
وموانسينك
مهما تقول
ف حروف موالك
بص يمينك
لمـحـبـيـنك
وبلاش يعنى تبص شمالك
حس بفقر الناس ودموعها
نشف دمعنا مـرّة بشـــالك
اعمل شىء يسعدنا للحظة
اعمل حاجة نقــــدّرهالك
ايه اللى اتغـيّر؟!
ايه اللى اتجدّد؟!
مات الحلم واصبح هالك
فـقــــر وغــم وهــم وذم
وانت ياسيدى مريّح بالك
هى الأرض دى كانت ارضك
طيّب مين كان سجلهالك ؟!!
مصر ماهيش عزبة تبيعها
مش من حقك ، مش اموالك
ربنا بكرة ضرورى يحاسبك
ديه نصيحتى اللى بأقولهالك
كنت تمّهــد أو تقنعنا
اكدب كدبة نصدقهالك
بكرة تاريخنا ح يكتب عنك
بكره ح نعرف مين اوحالك
مش ح يدوملك يعنى الكرسى
كان دام يعنى لحسنى ومرسى
بكرة ضرورى الحق ح يظهر
بكره ح نخـــرج من اوحــالك
مصــر ماهيش عزبة تبيعها
ديه نصيحتى اللى بأقولهالك
*****************
احمد حسن عمر
15/4/2016