تسمح لي
اصبح بس علي قلبك
ولو يعني مفيش إزعاج
تخللي عينيك تفتح لي
صراحه بجد
بشتاق لك
و مش بكدب
و لا تقولشي عليا بخاف
انا لو كنت عصفوره
هكون لك بسمتين و جناح
و هعملك نشيد صداح
و ازقزق لك مسا و صباح
و اغمض
بس علي قلبك
و افتح
بس علشانك
و اغني لك غناوي صباح
لو يتعبني يوم صوتي
انا اتعب
عشان ترتاح
و لا هشكي
من الموجه
و لو جايه كمان حاره
انا حره
ما دام طيفك يظللني
و مش خايفه
ما دام صوتك مطمني
و هعمل من عيوني حجاب
و اخبيهم عن الحجاب
و هرقي بسمتك فيا
و هزرع رمشي حنيه
و هعمل من ضلوعي
كمان و هعزف لك
كمان الحان
و هنشر ورد ف الغيه
و هملا العش ملاغيه
و اجيب لك عقد م اللولي
و تشرح ليا احوالك
و كل الحب قولهولي
صباح الحب
من قلبي
صباح الود
من روحي
هغني و إنت تسمع لي
و إسمك احلي اغنيه
و اخللي المد ف حرفك
من اﻷخر و م اﻷول
و هتحول لجنيه
تشاور ع القمر
ينزل
تشاور ع الشموس
تطرح
تشاور ع الزعل
يفرح
تشاور ع اﻷلم
يعزل
تشاور ليا
اقول شبيك
حبيبي و بس
انا ملكك
صباح الحب
.......
جهاد زيادة