وادينى جيت
عشان أثبت لروحى حاجات
أقلها ان تقديرى
فى وزن الخلق مش تفاهات
وان الناس
بتتعامل على الظاهر
وتتصنع براءة الود
وتتظاهر بولع الشوق
بكام ضمة وسلام باليد
لكٍن الأمر بات مكشوف
لا ينفع فيه مدارية
ولا ينفع خجل وكسوف
ساعات قاعد
ف قلب البيت
وكل بيبانه مفتوحة
وانا وحدى
مفيش قدامى
غير الحيط
ودقة قلب مجروحة
وكام كرسى
ف توب الموت
سكون وسكوت
وصوت بيئن جوايا
كما السكين
يشق الصورة ف البرواز
وم الماضى
يعبــى سنين
أروح وياه
أشم العطر ف السيره
واسافر بالحنين جواه
أملٍى عيونى ف البستان
واقطف منه كام وردة
وكام نسمة
تبًرد حُرقة الغربة
ونار الوحدة والأحزان
وانا وحدى
ف قلب البيت
باونس وحدتى بروحى
وباترحًم على الأحياء
عيون الخسة والريبة
وشوش الكدب والبهتان
أشد الخيط
يسيل الدمع كأنه بحور
اقوم اتمشى جوة الدار
الف وادور
ألملم فيا أحزانى
واعيد الحسبة من تانى
واراقب من بعيد الباب
الاقى الباب حزين مكسور
احس انه بيندهنى
فاجرى عليه
وامسح دمعتى بعينيه
واطبطب ع الحيطان وامشى
وانا مقهور
..........
محمود وحيد