شعاع فجرك...قصيدة للشاعر/ مصطفى تيسير

شعاع فجرك ..
بينسج نوره م العتمه ..
و رغم الزحمة و الكتمه ..
بشوف فجرك بيرقصلي ..
و بيغنيلي علي بابك ..
و باجي و أبوس ف أعتابك ..
و أنا و أهلك و أحبابك ..
بنرسم كل تفاصيلك ..
بنرسم بحر ف الصحرا ..
بنرسم بالعرق نيلك ..
و مهما بعدنا بنجيلك ..
بنحفظ أصل تكوينك ..
صحيح الأصل من طينك ..
رقيناكي ببخور مريم ..
عملنالك حجاب م العين ..
أنا المسلم و أنا القبطي ..
أنا الأتنين .. أنا الأتنين ..
أنا ديني علي دينك ..
أنا فرعون .. و بتفرعن
ع الملاعين بكون ألعن ..
و لا بكدب و لا أخبي ..
أنا حافظ كتاب ربي ..
أنا موسي علي أهلي ..
أنا زكيت .. أنا صليت ..
أنا حجيت لبيت ربي ..
تعيشي يا مصر و تربي ..